am730 (大明燈 M28, 2011.7.25)

呢個周末，孫柏文睇電視講政府喺立法會搞諮詢，問市民關於版權法例修改嘅嘢。當中最惹火，就係網上侵權要坐監。

首先，我想同大家話，推動呢條草案嘅人，其實唔係啲被人改圖嘅建制派。其實係嗰啲希望喺年尾多啲 bonus，喺啲美國人話事嘅電影、音樂組織返工做亞太區低級PR嘅人叫政府推嘅。問題係如果我用一幅劇照，改圖去諷刺某政客，使唔使拉呢？

依家嘅解決方法，係版權持有人，可以循民事訴訟，告人攞賠款。如果呢條修訂通過，就變咗係有人報警，差佬拉人。呢種修訂喺美國國會都提過，不過班國會議員向呢啲唱片、電影組織話：「你哋唔好玩啦。咁離譜都得。」係得我哋啲低級公務員，先會幫呢啲組織推呢條修訂。

我知西環呢排要曾特首諗吓點解啲人咁憎佢同政府，呢條修訂就係最典型令受影響嘅人really pissed off。改圖嘅人會問，做咩又要做呢啲小動作呀？為乜呀大佬？美國都冇啦！講真，為減民怨，強迫金呢個畸胎都可殺，收番呢條修訂啦。

不過，最可悲係，真係又出現啲不吃人間煙火、不切實際、象牙塔上嘅學者喺呢個議題上發功。嗰日，香港大學法律學院副院長李雪菁女士就話，「只要改圖有『足夠』原創成分，就唔會有事㗎啦。」

阿李auntie，你明唔明政府點執法㗎？你估差佬踢門會理咩叫「足夠」咩？有人報警佢哋就做嘢。個差佬踢門，律政司都仲未決定告唔告，呢位改圖朋友嘅阿媽已經攞咗衣車下面櫃桶裡嘅孖人牌鉸剪，狠狠咁剪斷條 ethernet cable，跟住仲要喊話，點解會教個仔教到佢犯法。

定係話不如去銀行提款，都會被拉話「不誠實使用電腦」。等到個官判？攞唔番堂費又點？問妳攞呀？特區律師費已成為最令窮人含恨嘅武器，threat of legal fees 呀，李院長讀吓博弈論啦。唔好咁傻咁天真得唔得？

最後，記得幾年前，我同何秀蘭議員傾過不如好似美國咁，搞個Electronic Frontier Foundation，裡面資助網友因網上行為被告嘅「請律師基金」，點知何議員話咁係犯法。曾特首，我哋真係好憎你，撤回修訂吧！