金融一條針:環保真理教

爽報 (財經V36, 2012.1.06)

政府話要填海。好似賊佬試沙煲,攞廿五塊地出來,又唔講到明的地要來做乜。

暫時,除左外綠內紅既西瓜份子,好似無乜人出來反對。老實講,以今時今日既環境,個個喊咁口話要增加住宅供應。無地方,又點增加土地供應?所以,之前誓神劈願反對填海既知道份子,好多都忽然支持填海。

英文報紙引述,西瓜份子乜乜觸覺既譚某,話終極解決方法係capping the population(為人口封頂)。早幾日,老總沙膽虹話呢個譚某係「歪理又嚟」,計我話,呢類人直頭係反人類。

為人口封頂?佢講乜啊?唔畀人生仔?學大陸咁一孩政策?定係禁止人移入香港?有無聽過人口老化?定係佢想將的老人家點樣啊?

呢類西瓜,唔單止係歪理,直頭係思覺失調,當正自己係上帝,主宰其他人既生死。

講開又講,我同幾個老友都覺得,香港就算要填海,都應該講清講楚響邊到填,為乜填,同埋填又之後交通基建配套係點。無啦啦整個人工島,但係又唔諗清楚用來做乜,嗯,我有少少擔心,呢一單野增加土地供應都係其次,最主要都仲係為左幫班工程、基建既得利益搵著數。雖然講香港庫房大把盈餘,但係呢度一千幾百億,個度又一千幾百億,到最後我地都可以變成歐洲咁,仙都唔仙。

八、九十年代,港英雖然大興土木,但係背後永遠都有一把聲,經常提醒大家:基建有必要就起,但係唔好益左英國工程商。 唉,此一時也,彼一時也,回歸十幾年之後,背後同一把聲,就叫我地要起呢樣,起個樣,如果唔係就畀人邊緣化。不過,我地香港人見到一個個基建工地,到處都係中國乜乜,中國物物。

其實,香港要增加土地供應,又或者住宅供應,除左問「點樣」(How),都要問「點解」(Why)。

點解要填海填到去長洲?點解要係人工島呢?如果價值觀係要「保護環境」,究竟係長洲以南既環境比較有自然保育價值,定係沿住現有已經發展既海岸線填出去會更加理想呢?係唔係一定要填海?係唔係所有舊區都唔可以重建?係唔係乜都唔拆就等於保育?係唔係起高樓就等於唔環保?

係唔係西瓜分子講既野就一定等於環保真理?

利世民

Facebook Comments

Leave a comment