爽報 (財經V29, 2012.2.8)

尋日做完開市埋位，見到孫柏文，第一句佢就話：「我唔贊成你節目入面嘅講法話債市已經去到泡沫末期！今時今日，市場集資最平，一定係債券。你睇，間間企業一回購自己股份，股價即刻跌到七個一皮！」

點解投機者追捧「企業債券」呢？高息？咁就唔係平啦。其實之前響《蘋果日報》「利字當頭」我都分析過，企業願意畀呢個息，一定唔會係蝕本生意。簡單講，就好似教科書入面所講，當市場息率跌到低無可低，惟一可以發展嘅方向，就係回升；利息升，債券價錢自然會跌，一切就係咁簡單。

投機者，尤其是聽左伯南克講話2014年之前都唔會加息，主流都認為利率會一直維持低位。對唔住，呢個諗法，非常之咁錯，亦好危險。伯南克話唔加息，唔代表市場利率唔會上。

息高唔代表經濟好

事實上，伯南克可以控制嘅係各大銀行存放響聯儲局嘅結餘利率，亦即係所謂Fed Funds。不過，市場對資金有供求，換句話說，資金成本最終都係由市場決定。資金成本，好籠統咁講，就係利率。

利率乜野時候會升？對拆借一方，如果預期有通脹，相信錢嘅購買力會減，就會要求利息高的；又或者，當前景多左不明朗因素，風險系數增加，要求嘅利息又高一啲。即係話，利率升唔代表經濟好；經濟差，資金短缺，訊息又混亂，利率一樣可以升。向好方面諗，如果經濟環境回復正常，利率一樣要回升到自然水平。又或者，就係貨幣寬鬆造成嘅通脹不斷升溫，根據過往幾十年歷史，央行最終都要用加息，而且係不斷加息去抽緊銀根。

最後一個可能性，亦係機會率最低嘅一個，就係衰退令資金需求急減，即係有錢都無人肯借，最終演變成通縮。不過就算係咁，發債企業只要管理好滙率風險，最多都係還得辛苦一啲。歷史嘅教訓係，如果企業所在嘅國家貨幣大幅貶值，但係借嘅錢就用國際貨幣計數，呢一筆外債，就真係一世都還唔清。

講到尾，其實自從各國央行一齊量化寬鬆，好多經濟因素就出現不同程度嘅扭曲；當中，最厲害嘅扭曲，就係利率。發債其實代表睇死央行無可能永遠咁壓抑利率，呢個投機概念，我認為非常合理喎！

利世民

專欄電郵：SharpHK.Simon＠gmail.com

Facebook專頁：www.facebook.com/AppleSimon