利世民:餐餐自助餐

爽報 (財經V32, 2012.2.10)

 

無限上網,台灣叫「食到飽」。數碼通唔再推出無限上網套餐,好多人即刻躁動起來,好似就快要世界末日咁。
其實我第一個擔心,反而係好似《蘋果動新聞》、《爽報》聽新聞呢類數據使用量大嘅平台。朝早返工,公共交通工具上面,十部智能手機,九個上緊動新聞。無咗無限上網,真係唔知會有乜影響。互聯網世界,有人形容係自助餐,消費者鍾意乜,就自己去攞,唔使等人餵。不過大多數人都係眼闊肚窄,食來食去都係嗰幾味。有人統計,大多數互聯網消費者,每日睇嘅內容,來來去去都係嗰幾個地方。
人總想有個Option,梁家傑都識得講:有得揀,先至係老闆嘛!呢個角度睇,實在好難怪大家對無限上網依依不捨。但係呢個Option又值幾多錢呢?
自從iPhone出現,蘋果強制要求電訊商推出無限上網套餐,手機上網由小眾變大眾,好多人都話大勢所趨。但由舊年開始,好多流動電訊商,一係放風話要停推無限上網,電盈甚至唔聲唔聲就轉晒做最高4G用量。講得好聽,就話要高用量補貼低用量。不過,計我話,公關講乜都無用,都係算吧啦!
手機發展快過基建
實情係,電訊行業用高資本投入,回取現金流收入。今時今日大家用緊嘅服務,好多都係以前投資落嘅基建。當利率被壓低,對需要大量資本嘅公司都幾着數,加上有穩定現金收入,所以過去兩年,上市電訊公司表現都唔失禮。就連誠哥都「翻啅」吃橙,大家就知道聰明人買乜嘢啦!呢種日子,上市電訊公司話要變相加價,站在公關角度,又真係幾難處理。
話說回頭,固網由按時間收費到月費任用,大概經歷十幾年。時至今日,如有固網商話要按使用量收錢,恐怕無人會示威抗議,因為大家都話:「睇你呢次會唔會輸到出血!」何解?因為做呢樣嘢嘅固網服務供應商,一定會走客走到佢哋驚。
固網服務由銅線到光纖,容量以幾何級數上。但喺流動網絡世界,情況就剛好相反,手機發展,再加上內容爆炸性增長,遠遠快過基建。所以短期一定會出現流動商加價現象。長遠來講,應該會有公司諗吓點樣用技術有效利用大氣頻譜。咦?又係投機概念喎!
利世民
專欄電郵:SharpHK.Simon@gmail.com
Facebook專頁:www.facebook.com/AppleSimon

無限上網,台灣叫「食到飽」。數碼通唔再推出無限上網套餐,好多人即刻躁動起來,好似就快要世界末日咁。



其實我第一個擔心,反而係好似《蘋果動新聞》、《爽報》聽新聞呢類數據使用量大嘅平台。朝早返工,公共交通工具上面,十部智能手機,九個上緊動新聞。無咗無限上網,真係唔知會有乜影響。互聯網世界,有人形容係自助餐,消費者鍾意乜,就自己去攞,唔使等人餵。不過大多數人都係眼闊肚窄,食來食去都係嗰幾味。有人統計,大多數互聯網消費者,每日睇嘅內容,來來去去都係嗰幾個地方。

人總想有個Option,梁家傑都識得講:有得揀,先至係老闆嘛!呢個角度睇,實在好難怪大家對無限上網依依不捨。但係呢個Option又值幾多錢呢?

自從iPhone出現,蘋果強制要求電訊商推出無限上網套餐,手機上網由小眾變大眾,好多人都話大勢所趨。但由舊年開始,好多流動電訊商,一係放風話要停推無限上網,電盈甚至唔聲唔聲就轉晒做最高4G用量。講得好聽,就話要高用量補貼低用量。不過,計我話,公關講乜都無用,都係算吧啦!

手機發展快過基建

實情係,電訊行業用高資本投入,回取現金流收入。今時今日大家用緊嘅服務,好多都係以前投資落嘅基建。當利率被壓低,對需要大量資本嘅公司都幾着數,加上有穩定現金收入,所以過去兩年,上市電訊公司表現都唔失禮。就連誠哥都「翻啅」吃橙,大家就知道聰明人買乜嘢啦!呢種日子,上市電訊公司話要變相加價,站在公關角度,又真係幾難處理。

話說回頭,固網由按時間收費到月費任用,大概經歷十幾年。時至今日,如有固網商話要按使用量收錢,恐怕無人會示威抗議,因為大家都話:「睇你呢次會唔會輸到出血!」何解?因為做呢樣嘢嘅固網服務供應商,一定會走客走到佢哋驚。

固網服務由銅線到光纖,容量以幾何級數上。但喺流動網絡世界,情況就剛好相反,手機發展,再加上內容爆炸性增長,遠遠快過基建。所以短期一定會出現流動商加價現象。長遠來講,應該會有公司諗吓點樣用技術有效利用大氣頻譜。咦?又係投機概念喎!

 

利世民

專欄電郵:SharpHK.Simon@gmail.com

Facebook專頁:www.facebook.com/AppleSimon

 

Facebook Comments

Leave a comment