爽報 (財經V32, 2012.2.27)

睇經濟好壞，分析員鍾意睇各種數字。好多人鍾意每月最新PMI（採購經理指數）做文章。PMI反映供應鏈客觀情況，數據雖落後大市，但總算可用來反照之前情況。

不過有啲調查，針對主觀感覺，甚至要被訪者預測未來。主觀問題做調查，被訪對象好多時傾向大路答案回答；經濟前景做民調，被訪者多數唔講自己點睇，而係估其他人點睇，最終結果就傾向一個主流睇法。

主觀感覺如夢幻泡影，消費者信心轉瞬間變，調查有乜意義？有人認為被訪人數越多就越近真相，以為多人認同就唔錯，係填鴨式教育特點。

嚴格分析，最好避免用民意調查。可惜近幾十年，大學裏尤其社會科學學系，常鼓勵研究生做民調，繼而媒體，甚至經濟分析，情況已到濫用嘅地步，這現象非常唔健康。「唔通唔用數據？」填鴨式教育另一特點，你叫佢戒壞習慣，佢就駁嘴：「呢樣唔做得！嗰樣唔做得！你話我知做乜好喇！」講到尾都係無創造力，唔肯認又要人家畀答案。

價格交易額呃唔到人

經濟學裏，P（價格）同Q（交易額）係呃唔到人嘅數字。雖我唔認為玩數式係增進人類對宇宙事物認知極限嘅唯一方法，但若要玩數字，都唔該用啲實淨少少，唔好學埋啲旁門左道。

過去幾十年，有大班經濟學學生喺失業率上窮不少心力。就業人數，尚可用報稅呢類比較客觀嘅資料反證。不過一個人無嘢做，出於自願定無可奈何，你點知？統計員打電話問：「先生，請問過去半年你屋企有無人搵緊工呀？」「無認真搵喎！不過咁啱行過快餐店見有招聘，入去問吓，算唔算有呀？」用無意義嘅數字做文章，結論好難擲地有聲。

前財政司郭伯偉有洞見：垃圾數字攞番嚟，累人累物。財經分析，技術派永遠只睇成交同價格，亦有道理。

利世民

專欄電郵：SharpHK.Simon＠gmail.com　
Facebook專頁：www.facebook.com/AppleSimon