國有化港鐵

爽報 (財經V36, 2012.6.21)

 

回購港鐵(066),千祈唔好以為一定係政客先至會講。噚日,瑞信發表報告,話反正政府同港鐵傾票價呢宗關聯交易,小股東都冇得參與,政府不如全面收購港鐵,估計有27%上升空間。

嘩,乜瑞信又玩國有化概念呀?先旨聲明,我都有講過,歡迎「思歪」出8成至1倍溢價去國有化領匯(823)。不過,最終如果政府唔去國有化領匯,我一樣開心,因為就算賺唔到呢一筆,我都可以睇住領匯為社區增值,提高回報,創造就業。

但係,如果港鐵被國有化,結果會點呢?「思歪」政府會大幅補貼港鐵票價,其他交通工具會點?一樣要補貼好唔好?鐵路特點係固定成本高,所以,補貼票價真係冇乜所謂。但係對其他交通工具構成不公平競爭,一定會嘈。再補貼呢啲交易工具,例如巴士同小巴,會做成嘅扭曲,搞到庫房係營辦商嘅提款機,唔可行。去到最後,唔通政府又要國有化埋兩間私營巴士公司?

再講,港鐵係香港最大地產發展商,透過賣樓補貼鐵路發展。如果票價又唔可以加,國有化之後港鐵又唔可以用賣樓收益補貼鐵路發展,結果,融資可以點搞?梗係庫房啦!唉,「思歪」都未上場,已經咁多人想特區開庫,畀佢做足10年,真係唔敢想像。

 

利世民

專欄電郵:SharpHK.Simon@gmail.com
Facebook專頁:www.facebook.com/AppleSimon

Facebook Comments

Leave a comment