防火牆

爽報 (財經V31, 2012.7.04)

 

尋日,有讀者留言話,梁振英上任只有一日,有何缺失?我又憑什麼去話人家?

講得好!如果,梁振英最終真係捍衛港人治港、高度自治。我認錯,冇問題。不過,我提出我既擔心,亦都有講明理由。

查實,呢位讀者似乎唔覺得港人治港、高度自治有乜咁值得保留;佢引述《亞洲週刊》總編輯邱立本:「回歸十五年,香港有些精英仍抱着這樣的思路,認為大陸太大、太多腐敗、太黑暗,而主張兩地要有一道防火牆。」

Guilty as charged。不過,邱立本又算甚麼?我同好多香港人一樣,唔敢認係精英,只不過係想有個地方,搵啖安樂茶飯。我哋上一輩,辛辛苦苦由上面落黎香港,究竟為左乜?主張香港有道防火牆,唔使我解釋為什麼!

究竟邊個國家起左道牆唔俾人出走?大陸定係香港?邊度有自由、邊度冇,好明顯。當然亦有人可以話,大陸改革開放咁多年,已進步咗好多,唔應該當大陸係六、七年代嘅大陸。

就算係咁,我仍可大膽講句,今日大陸有好多問題,尤其經濟。誠然,我對大陸經濟既悲觀,反而先係非主流。「Ha!歐美日又好好咩?」好多財經中人,對大陸其實好Bullish。不過,歐美日有結構性問題,唔代表大陸就係好過人地。我份人就係咁保守,唔只係針對大陸。

 

利世民
專欄電郵:SharpHK.Simon@gmail.com
Facebook專頁:www.facebook.com/AppleSimon

Facebook Comments

Leave a comment