金手指 : 未來五年審慎樂觀

蘋果日報 (財經要聞B07, 2012.8.30)

 

今日,孫柏文35歲。記得五年前嘅8月29同30號,我一連寫咗兩篇題為《廿歲年代的句號》同《未來的開始》嘅文,來總結廿歲世代嘅經歷同未來想做嘅事。

咁總結由97年8月至07年嘅廿歲世代,我都仲估冇可能更驚濤駭浪。先見亞洲金融風暴,之後炒擺到明係泡沫嘅科網股,喺12蚊買、18蚊賣,作為唯一一次掂當時仲係盈科數碼動力(當時股票編號1186),好好彩。

 

創業欠債變雙失

科網泡沫爆咗之後,成功做咗香港第一代嘅雙失青年。一路捱到沙士之後冇耐,先至以四位數字人工,即攤開鐘數時,一定冇28蚊一粒鐘嘅價,喺股票行開始我石油股分析員嘅生涯。到今日,我都仲係好感激當時股票行老闆LCM畀我入行機會,因為我今時今日絕對同意,就算冇28蚊一粒鐘,我都係唔值嗰個價。

又好多謝老闆當年係咁鬧我,雖然當時我覺得佢好乞人憎,不過依家睇番,特別係我睇今時今日啲後生做嘢時,先知當年老闆已經勒住同埋真係用心良苦。

見依家係立法會選舉期,我亦會諗起當年參選得嗰1000票嘅經驗。最令我難忘,就係之後講番,我覺得好失敗時,我堂哥一句:「有邊個選特首比你得票多?」自己依家諗番,對我為香港人曾經提供過一個另類嘅選擇無悔。

做做吓分析員,想創業,辭職去搞。點知喺搞起前,燒晒啲資金,仲要有啲資金係問啲兄弟借。原本啲兄弟個個都同我講還到先還,點知佢哋陸陸續續成家立室,啲阿嫂們落壓力,佢哋話:「唔還本,都要還啲息等可以交代。」

咁其中一個兄弟,就係隔離版嘅利世民,佢話《蘋果日報》想搵個前金融業從業員,從佢嘅角度「乜都講吓」。就喺咁,喺06年3月6日《金手指》面世。亦喺同一日,我就以一篇題為「一注獨贏買白銀」嘅文章,擔起做白銀戰隊隊長嘅責任,去同一班買白銀保護自己血汗錢購買力嘅隊員,對抗央行們為首嘅紙幣狂魔。

嗰日,白銀賣10美元一盎斯,我亦話10年目標價係120美元一盎斯,六年半後嘅今日,白銀賣30美元。

由06年開始,我不斷警告話全球將會來一次超級金融危機,記得寫過啲例如喺06年暑假題為「美國樓市將慘過八萬五」嘅文。結果係未爆次按前,被人評為「自瀆文章」,佢仲話如果白銀見120美元,咁黃金咪幾千美元?仲唔世界末日?記得,呢個係07年8月前嘅世界。

 

黑天鵝比預期多

由07年我30歲生日到今日嘅五年,我係完全做唔到我想做嘅事,就係未成功成家立室。理由亦唔難明,因為當我仲估冇嘢可比廿歲世代更驚濤駭浪之際,由雷曼到做幾棲傳媒人,量化寬鬆到鏡頭前貓咗,最低工資到入深切治療部,原來自己同呢個世界可以比預期有更多黑天鵝。

最後,我有諗過未來五年,自己同個世界會點。自己當然繼續搵個唔怕接受我嘅女人,世界就要來一次終極一印(所以要繼續買白銀)。不過問心嗰句,如果你2002年問一個香港人,未來五年會唔會比之前嗰五年難捱,遠都唔使講,你話佢會見到03年嘅事咩?水災將至,我亦用咗六年半時間叫咗大家上呢隻白銀做嘅挪亞方舟。未來五年?審慎樂觀吧。

 

孫柏文

作者為獨立股評人

本欄逢周二、四刊出

Facebook Comments

Leave a comment