攬水泡定學游水

爽報 (財經V36, 2012.9.18)

 

俗語話:「牛唔飲水,點㩒得牛頭低?」意思就係,利誘嘅威力,點都勁過威逼。但係,如果牛唔口渴,又點樣逼牛飲水呢?伯南克就會答你:「搵水浸隻牛,點到佢唔飲?」QE就係水浸。水浸,點樣自保好呢?有人就話,梗係買金銀啦!因為,實物抗通脹嘛。

廿世紀初,地球仍然有國家係金本位(美國),或者銀本位(中國)。當時,政府普遍冇人信,發行紙幣,仍然要有金銀做支持。自從70年代初美國單方面破壞美元黃金兌換保證,地球進入完全冇本位制度。過去四十年,不斷通脹嘅局面,貨幣購買力不斷削弱;黃金雖然價格有上有落,但係貨幣地位就不斷被邊緣化。

原來,十九世紀美國,由金銀並行轉成金本位,有人用咗近半世去為白銀平反,最終都係得個桔。佛利民所寫嘅《Money Mischief》,當中有好大篇幅,就係呢段歷史。言下之意,就係話黃金一旦失去貨幣地位,下場就好似白銀咁,一去不返。黃金由1971年每盎斯31美元到今日嘅每盎斯1770美元,睇落好勁。不過,亦有另一派睇法,覺得價值係創造出來,係人類求生意志之本。

所以,價值投資派,寧願買有定價能力強嘅企業股票。用水浸做比喻,買金就係攬水泡,價值投資就係學游水。你話揀邊樣?

 

李兆富

Facebook Comments

Leave a comment