逆回購冇用

爽報 (財經V36, 2012.9.26)

 

每日行過上環德輔道中,都會睇吓人民幣牌價。

昨日,人民銀行公佈史上最大逆回購,街邊人民幣買賣差價即時擴闊,由平時20點子,加到成35點子。講開又講,德輔道個名真係起得好,以前班師爺,真係有一手。今日嗰啲甚麼環保道、金融街,俗到死。

 

對資金需求減少

講番逆回購。記得今年5月底,睇到一篇彭博報道,話四大國有銀行,自2006年有貸款目標以來,可能首次未能達標。我就話,按道理,應該就會減息。結果,冇幾耐,真係減息,同時間,人行透過逆回購,印銀紙。

「逆回購唔等於印銀紙!」寫緊上面嗰句嘅時候,我彷彿又聽到填鴨式教育嗰班才俊,嘗試用大量資料,去處理分析。當然,央行唔係直接去部印鈔機㩒掣。事實上,只有津巴布韋級嘅國家,先至會直接印。而且絕大多數嘅央行,一定會透過銀行做嘢,但係目的都係一樣。

「為市場注入資金。」唉,有時候,我都唔知點講至好。「銀行唔夠錢喎,佢哋話。」官方嘅宣傳,如果信到十足,咪就係俾人洗腦。事實上,心水清就知道,問題根本就出在對資金需求減少。

當資金需求減少,增加供應,究竟有乜用呢?偏偏好多人就會信咗官方宣傳所講,只要增加資金供應,需求就會出現。講真,呢啲之唔係讀書唔通囉。一、兩年前,宏觀經濟調控,將供應抽緊,的確有缺水情況。不過,時至今日,環境已經唔同咗。

 

經濟始終要着陸

無論軟着陸抑或硬着陸,都肯定要着陸。撐住個市?點撐呢?如果純粹增加資金供應可以撐得住,邊個做央行行長都無所謂啦。事實上,讀經濟學,最終啟發係,市場複雜程度,遠超任何一個人可以想像。以為可以用一、兩招就扭轉情況,最終只會令扭曲更加嚴重。

講到尾,大陸嘅問題始終係太多扭曲,資金有得自由流動,結果會非常唔一樣。「嘩,自由流動,咁咪好亂囉。」亂,係主觀睇法。你話依家唔亂咩?問題係,有啲亂,結果會有驚喜;有啲亂,結果卻係更亂。

 

李兆富

Facebook Comments

Leave a comment