點樣無本生利?

爽報 (財經V34, 2012.10.09)

 

一直以來,我都主張「力不到不為財」,不過,好似真係冇乜講過,有冇無本生利呢回事。

上星期五,有線Money Cafe入面又同錢志健拍檔。錢兄除咗見多識廣,故仔仲多,講創業,好多真人真事分享。不過,另一拍檔心欣(即係肥孫個300萬倉真正話事人)問咗個問題,都幾值得大家反省。

「八十後點樣創業?」心欣好強調呢個身份,不過,社會開始湧現九十後同千禧後,心欣亦開始俾人叫做「心欣姐」。

 

尋需求創價值

講番創業,更正確啲講,應該係創造價值。世界上,有兩種方法去創造價值。一,就係將勞力、資源同方法混合,變成產品同服務,有人叫實業,但係我覺得包含得唔夠。二,就係透過交易,將已經存在物品嘅潛在價值發揮出來。千祈唔好睇小第二類嘅價值發現。幾年前,有個後生仔,用一年時間,靠互聯網,由一個超大碼萬字夾,經過廿幾次交易,最終換到一間屋返嚟。

周末,繼續沉思呢兩種創造價值嘅方法。我發覺,兩個方法,有一個共通點,就係創造價值嘅人,都係要透過發現需求。發現需求,可以話係創業之母。

Money Cafe觀眾Kelvin Tse兄上facebook留言,分享咗一個「空手道」創業故事:話說,有個印刷廠的老闆,向印刷機廠講,在中國設showroom,他有免費印刷機,廠家就有免費showroom;剛好,當地政府招商引資,將廠定為模範廠房做宣傳,象徵式收租金一元!

 

明白欲望本質

好多人話係三贏,我就覺得係,呢位老闆睇到家家有求。許多創業嘅人,會掉轉頭諗,自己有乜嘢可以拎出嚟賣。其實,呢個世界,有心人,真係要乜有乜,尤其有互聯網,要搵貨源、搵資本,有幾難?最難嘅係,點樣知道其他人想要乜。因為,絕大多數時間,人,其實唔知道自己想要啲乜。

所以,成功創業家,多數都係欲望好強嘅人,原因唔單止係貪念,而係只有真正明白欲望嘅本質,先至有創業嘅條件。

Facebook Comments

Leave a comment