富事通 : 窮孩子 富孩子

爽報 (財經V34, 2012.11.26)

 

蘋果日報《利字當頭》鄰居Alison早幾日講過貧富問題。

周末,剛好有個今年大學第一年嘅獅子山學會學師仔,搵我傾偈,又講到佢遇到嘅階級問題。詳細內容我唔逐一去講,不過,我自己都反省過,覺得值得同大家分享。

 

辨物質背後優劣

一,窮同有錢,只不過係生活境況。有錢拎出來炫耀,固然令人討厭。但係時時將自己嘅窮,攞出來扮清高,一樣係虛偽。平常心嘅意思,就係要將自己嘅本質,同自己嘅境況分清楚。

二,生活富足,走去話體驗窮人生活,係最戇居嘅行為。

鬼唔知窮困慘咩?幾年之前,香港電台搞咗個「窮富翁大作戰」,叫啲二世祖去體驗貧窮。當中嘅潛台詞就係話:「你班二世祖不知民間疾苦。」難得又有班二世祖想扮好心,走去掃街瞓籠屋。

不過,對唔住,窮人好慘,大家都知。真正嘅問題唔係佢哋有幾慘,而係點樣先至可以脫貧。走去體驗貧窮,就可以諗到方法幫人咩?

三,生活未夠富足,亦唔需要否定有錢人嘅物質生活。

呢個世界,有好多物質享受,其實係美好嘅事物。見到豐富嘅物質就認定係腐化,諗法不但膚淺,亦反映呢個人嘅價值觀係幾容易腐化。可以睇穿價錢牌,見到物質背後嘅優劣,係享受人生嘅第一步。

四,享受無罪。呢個重點係享受而並非炫耀。將享受當作炫耀,就唔係享受。炫耀,背後就係缺乏自我嘅表現。享受,係個人嘅事,分享就係真心覺得樣嘢好,係對物質以及對背後創作人嘅欣賞。

 

懂欣賞勿扮清高

五,如果想生活富足,就要學習欣賞物質同創作人心思,因為只有懂得欣賞同創作,先至可以為別人帶來美好事物。

成世人只係諗住扮清高擁抱貧窮,又點可能帶其他人離開貧窮?越係逃避人家嘅富足,一味淨係憎人富貴,結果只會令自己變得偏激孤獨,心理不平衡。

用平常心睇貧富,其實都係理財創富嘅精神。

 

李兆富

Facebook Comments

Leave a comment