工時立法敗壞職場道德

爽報 (港聞V06, 2013.03.20)

 

行街見到政治演員橫額,寫住爭取超時補水1.5倍。1.5倍咁少?我就爭取3倍啦,不過我就幫自己爭取,唔需要政治演員代勞。如果你有能力,多多你老闆都要畀,如果你冇能力,一毫子都畀多你。

點解搞到要加班呢?好多未來社會棟樑、政演,甚至有打工仔都話:「老闆出咗糧,就算你冇嘢做,都想見到你扮勤力加班。」

講呢種說話嘅人,一係就未真正打過工,好似好多工會政演,一係就做來做去都係二打六,升職永遠冇佢份嗰隻。點解呢種扮勤力加班嘅人永遠冇份上位?因為呢個世界,係睇你有幾大貢獻,唔係睇你有幾大犧牲。我最怕就係呢種人:以為自己付出好多,所以全世界欠咗佢嘅。

實情係,呢個世界能者多勞,好多人要做到加班,因為上司覺得佢做得嘢,畀好多嘢佢做,加班就算冇即時補水,呢種打工仔都會上位比人快。而且,我接觸過呢種打工仔,絕對唔會話老闆剝削,而只會抱怨啲同事幫唔到手。

工時立法,加班要補水,老闆一定會嚴禁返工時間偷懶做自己嘢落街食煙,結果,只會令懶人越來越討厭返工。再者,勤力嘅人,可能想加班做完手上嘅事都唔得。實情係,工時立法,根本就係敗壞職場道德。

 

李兆富

Facebook Comments

Leave a comment