教育大鑊飯

爽報 (港聞V06, 2013.05.02)

 

「怪獸家長,係香港教育嘅問題核心」。唔少中產知識份子社會棟樑,自己甚至婚都未結,更加唔好話有細路仔,人講佢又講,諗都唔諗就話怪獸家長扭曲香港教育制度。

「師資唔得,香港教育又點會好?」另一班人,通常就係知識份子社會棟樑口中嘅怪獸家長,對教育制度一樣諸多不滿,情緒就發洩響教育嘅最前線,教師身上。究竟係教師水平唔掂?定係家長要求太高?呢兩個問題,我唔直接答大家,我用例子去回答。

假如有一日,特區政府覺得,香港家長蠢到唔識得去為細路準備均衡飲食,又有貧困家庭提供唔到有營養嘅飲食,反正幾千億盈餘唔知點使,就豪畀香港人,所有發育年齡以下嘅細路,一律有免費早午晚餐;家長如果唔畀細路去呢啲青少年人民飯堂,就係虐兒犯法,要坐監。

社會棟樑唔會覺得免費早午晚餐有任何問題,最緊要係人人食嘅都一樣。不過,有父母想細路食飽啲,亦有細路天生胃口比較差,去青少年飯堂之餘,自己出去又食多餐,仲要話人民飯堂廚師手勢唔好。結果,有細路搞到痴肥,亦有細路繼續營養不良。

有人認為,只要改改個餐單,大鑊飯總有成功嘅可能。噚日有報道指,新高中文憑又有近萬學生退修。究竟,幾時香港先會從教育大鑊飯解放出來?

 

李兆富

Facebook Comments

Leave a comment