爽報 (港聞 V10, 2013.06.10)

英文「snob」，本為拉丁文「sine nobilitate」，解作「無貴族身分」。19世紀，有經濟實力嘅平民，開始進駐牛津劍橋等著名學府。貴族人家，名字後有爵位封號，百姓子弟，就寫上s.nob，以示平民身分。諷刺係，snob出人頭地之後，反而階級觀念最重。久而久之，snob亦解做「憎人富貴厭人貧」嘅小資產階級態度。

今時今日，世襲相傳嘅貴族，理論上唔再存在。取而代之，係追求物質生活嘅中產價值觀，以及憑持有沙紙數目，衡量地位同存在嘅傳統信仰。兩套觀念混合起來，就成為優質教育嘅需求。

傳統名校聖士提反女子中學轉直資，有校友反對，話貴族化不利社會機會均等。不過，歷史教訓，社會棟樑式絕對平等主義政治口號，最終都係製造出特權階級。真心為教育好，應該諗下點樣幫辦學機構，由師資到教學方法同內容，爭取最大自由，因材施教。大家心知肚明，派位制度，先至係最不利上進嘅設計；最不利社會機會均等，其實係世襲式嘅特權。反對轉直資，限制收生自由彈性，唔見得對窮苦人家有乜真正好處。聖士提反女子中學校友，如果要爭取公平公義，理應放棄世襲，支持學校有更大收生自由。再講，假如怕收費令窮家女卻步，我相信校友們一定可以用自己力量同人脈，籌款成立基金會助學，實實在在咁幫助下一代。

李兆富