爽報 (港聞 V10, 2013.07.04)

蠢，相反就係精。精英，除咗聰明了得，亦敢於與眾不同。當然，做人唔需要吓吓標奇立異，但係關鍵時刻，總要知道有所判斷。香港社會偏好低調是福，精英定義，竟然變成曉得投群眾所好，混入主流。但話說回頭，只要精英為自己搵着數，不損人而利己者，又唔可以話精英有錯。

精英以外，就係庸碌無能之輩。庸碌無能者，無自我主張，唔知道點樣以邏輯推理何謂對錯是非；當精英放棄話事權，由呢班人上位，結果理性智慧分析判斷，貶值成靠聽靠睇靠直覺本能，只要人多聲大場面震撼，就等於正確。唔好誤會，我無話43萬人上街示威無道理，又或者唔知幾多人慶回歸有乜道理。不過，慶回歸同爭取民主，道德對錯並唔係由人數去決定。當七一活動淪為雙方小學雞式鬥人多，我只可以講，香港有超過600萬人以行動表示，佢哋想過自己嘅生活，唔想干預別人，亦唔想被干預。一定程度上，呢600萬人都想過香港精英嘅生活：不損人而利己。

庸俗嘅民粹政治，遊戲規則係鬥人多。不過，民主唔等於民粹；民主目的係制衡政府權力，留空間畀市民過自己嘅生活。所以，七一當日，絕大多數香港人都已經表達咗自己真正民主訴求。民陣同全港各界乜乜物物，唔好再騎劫港人，阿門。

李兆富