爽報 (港聞 V08, 2013.07.08)

帶隊一呼：「張炳良！」群眾百應：「撤！」

噚日，地產經紀上街。之前，本少爺都警告過，從來都未見過呢個市儈第一嘅行業咁關心一個政策。思歪政府唔識死，周末前再派個不食人間煙火嘅張炳良出來話：「氣氛良好……管理需求，難免有陣痛。」

遊行期間，熱到大汗淋漓，但我仍然思考，究竟點解調控樓市嘅政策同政治任務，會交畀張炳良去負責。

「運輸及房屋局局長負責，有乜唔妥？」傳統以來，房屋局負責公營房屋，運輸就係公共交通，組合係照顧中低階層嘅居住交通。發展局，就係管土地供應同使用，私樓係土地使用一種；事實上發展局雖然向政務司司長滙報，但實際上亦要同財政司司長交代，有宏觀經濟規劃責任。

調控樓市由房屋局負責，即公營房屋變成調控樓市工具。社會棟樑或者鍾意呢個安排，不過，我就好擔心規劃會變得急進，好易重犯當年偏遠地區單一發展公屋嘅社會病。城市規劃，唔係細路仔玩泥沙。上星期發展局局長陳茂波話要搞「加強版」新市鎮，佢知唔知八○年代屯門、九○後天水圍發生乜事？

正如當年將勞工同福利合併，香港工作精神，就由努力爭取，變成老奉當道。由本來負責公營房屋的去管樓價，房屋亦從此成為被調控商品。

李兆富