爽報 (港聞 V10, 2013.07.30)

上星期，經濟及商務發展局局長蘇錦樑重申，政府點樣都要回收香港四家電訊商3G頻譜，咁樣做明益中移動。十幾年前，如果政府咁樣明益一間公司嘅話，早就俾地產黨鬧到上北京。

不過，此一時也，彼一時也，今日阿爺親生仔直接落來攞着數，地產黨又可以同邊個投訴？

蘇錦樑話電訊商佔用頻譜，到期本應全部交還。不過，同樣係大氣頻譜，點解兩個電視台又一直都可以自動續牌？退一萬步講，電視行業就連引入競爭都遲遲唔行動，蘇錦樑真係要解吓畫。

政府點解雙重標準，大家都好清楚。但當兩件事同一個時空出現，又同一個衙門負責，唔該政府高明少少。若然競爭係大道理，就堅持到底；如果話今日核心價值係「顧全大陸」，亦都應該講清講楚。

話說回頭，頻譜強拍，唔可以叫做引入競爭。事實上，中移動老早已經有香港業務，只不過點都搞唔起，唔知係無心定係無力。

畢竟，大陸係一個封閉市場，入面也文也武，營業額以幾千億人民幣計。不過，如果唔係有政府鬆章，中移動可能連深圳河都過唔到，簡單講句，佢哋本身並無競爭力。

其實，為公道亦為庫房收入，政府可以將頻譜重拍，但現有營辦商有優先權以公開拍賣最高價優先續牌。咁簡單嘅方法，本少爺免顧問費送畀特區政府，唔使多謝。

李兆富