分析員必睇電影

蘋果日報.金手指/2019-12-23/孫柏文(獅子山學會董事)

上週,孫柏文睇咗一齣戲。睇完,第一個反射式反應係每個做分析員嘅人,都一定要睇。好戲!

呢齣戲係由漫畫改篇,叫《阿基米德之大戰》(我搵唔到正式譯法,所以自己來譯)。故事基本上係講兩班人爭同一筆budget,如果你懷疑對方做嘅成本估價係老作,嚴重偏低,爭贏咗筆錢,你喺冇關於對方project細節嘅情況下,點計條數去踢爆對方造假呢?

仲有,如果你係分析員,仲要係sell side,更要天腳底都摷呢齣戲睇。原因係呢齣戲中講嘅project,就係二戰日軍嘅「大和號」戰艦。搵分析員踢爆嗰個,仲要係話驚日本同美國開戰後,會滅國,不過幾年後決定偷襲珍珠港嘅山本五十六。而有一場講山本遊說個分析員嘅戲,山本知佢係個反戰者,同佢話唔踢爆大和號個估價,真係造咗出來,可引發美日戰爭。

個分析員只係一句,用兩個data point就輕易解釋點解完全冇得打。咁嘅salesmanship,真精彩。

而真係令我不得不推介嘅位,就係電影最尾,負責大和號嗰個,喺被踢爆後,點樣解釋點解嚴重低估造價去令管錢嗰個都繼續支持起隻船。

不過,最令我不斷諗呢齣戲嘅原因,就係負責大和號嗰個,最後點樣掉轉遊說個反戰分析員幫佢手造船,話起呢隻大和號,就係最可為沉淪於1905年日俄戰爭勝利嘅日本國民,從好戰心態中被喚醒。放棄周圍侵略。因為睇完,日日話自己係「第二大經濟體」嘅強國人,根本就係沉醉於同一心態。

所以結論係冇錯!呢齣戲係齣觀眾要用腦嘅電影。我多年冇update過嘅「甄別港女是否啱做老婆」嘅測試表上,又多咗個test。呢齣戲就係試吓條女有冇腦,同埋平時用唔用。大家自己摷片啦!

Facebook Comments

Leave a comment