孫柏文- am730 (大明燈, M34, 22/12/2010)

早幾個月前，長江實業(001)主席李嘉誠喺記招時俾記者問佢，會唔會捐身家等問題嘅時候，佢除咗公開佢第三個仔叫「李嘉誠基金會」外，仲話要將啲錢用得其所，睇下邊啲項目有用先捐。之後冇幾耐，佢個基金會就搞咗個「Love Ideas, Love HK集思公益計劃」，大致上係個「點對點」捐款計劃，有好橋嘅人就send橋過去，如果喺網站投票中，被「選民」選出，就由基金會出錢俾佢去搞。

但係香港搞乜幫人呢？香港人以前好鍾意捐公益金、東華三院、仁愛堂等慈善機構，因當時政府的公共福利開支有限，主要靠私人慈善機構，藉捐錢幫助社會上有需要人士，不過，自從彭定康後，政府大灑金錢「幫」香港人，基本上「幫人」呢個重任，已經被政府壟斷，好多慈善機構都唔知做乜好，有啲直頭去咗搞教育，開副學士班等等。咁究竟參加「Love Ideas, Love HK集思公益計劃」嘅人士，會提出乜嘢方法去幫助有需要人士呢？最近基金會公布咗個結果，孫柏文就上佢個網頁睇吓，一睇，原來幫助人以外嘅項目都唔少，好似第三名就係同樹木有關；排第八嘅「流浪貓派飯大行動」更加直接，就係問誠哥拎咗兩萬五千蚊，去買糧食餵俾流浪貓食，雖然好似好小數目，但係對啲貓貓來講，真係好有幫助。

孫柏文再碌落去睇，頭廿名之中，有3個都係同動物有關，可見香港政府幫人已經幫到盡，私人搞嘅就開始轉型去幫動物和植物。但正正因為呢個基金係「點對點」緣故，唔使經一個政府官員審查，反而令呢個基金可以幫到社會上受忽視嘅群體，雖然同政府數以百億元預算計相比，每個項目數目好小，但係效率可能更加高，唔使吓吓都由上至下咁分配審批。

我覺得李嘉誠度呢條「你出項目，再大家投票」嘅機制，最成功之處，係啲人講出真話。講出自己心目中覺得需要做啲嘢嘅社會問題。你搵議員、社福演員，會被抽水。你搵政府，因為知道佢驚納稅人鬧嘥錢，你唔敢叫政府出錢買貓糧，仲要係罐頭靚嘢嗰隻。你搵傳統慈善團體，你估會俾錢你餵流浪貓咩？驚啲donors會嘈啦！

原本我第一次聽到呢個idea時，我有同基金裡面嘅人講過：「On paper可以玩到好另類，李生係咪真係會尊重網民投票決定先？係勁要sense of humour喎。」嗰位朋友喺嗰刻，答唔到。今日就有答案，係會嘅。勁！

今次基金會計劃成功，絕對係因為「點對點」呢招有效，釋放咗社會上幫人嘅意念。究竟「點對點」呢條橋係邊個獻俾誠哥呢？Mark Zuckerberg捐錢時曾講過，因為佢女朋友鍾意教書，所以捐錢去搞教育。唔通「點對點」呢招，同Mark Zuckerberg一樣，都係女朋友啟發之下出產？

(作者為前石油業證券分析員，視股市為終身學習場所，不斷交學費。)